Afon Llifon

Mae Afon Llifon yn codi yng nghorsydd rhan uchaf plwyf Llandwrog, nid nepell o'r Bryngwyn, gan redeg trwy geunant ger Maes Tryfan. Yna mae'n mynd dan bont y lôn fawr a'r hen reilffordd ger Llwyn-y-gwalch, ac ar draws y caeau nes croesi Lôn Cefn Glyn dan bont nas gwelir bron, ac i mewn i Barc Glynllifon, lle mae'n llifo trwy'r Cwm Coed. O flaen Plas Glynllifon mae wedi ei ffurfio fel camlas at ddibenion hwylio cychod bach ac ati, cyn mynd ymlaen i droi melin y stâd. O'r fan honno, mae'n llifo trwy'r parc, dan Bont Plas Newydd ac i'r môr rhwng ffermydd Tŷ Mawr a Maes Mawr.

Ar un adeg bu'r afon yn troi nifer o felinau (gweler Melinau Afon Llifon). Dichon bod enw'r afon yn cyfeirio at gyflymder y dŵr, yn arbennig ger Maes Tryfan.