Emrys Price-Jones

Brodor o Lanllechid oedd y Dr. Emrys Price-Jones (1942-2020) ac fe raddiodd mewn Mathameteg ym Mangor ym 1965. Fe dreuliodd nifer o flynyddoedd fel athro Mathemateg, ac wedyn pennaeth adran Mathemateg yn Ysgol Dyffryn Nantlle, ar ôl cyfnod byr yn dysgu'r pwnc yng Nghaergybi. fe ymgartrefodd yn Y Groeslon, hynny'n ddigon naturiol ag ystyried fod ei wraig Elen yn ferch i Ifior Hughes, cyn-bennaeth Ysgol Penfforddelen yn y pentref. Am flwyddyn neu ddwy yn y 1970au bu'n bennaeth yn Ysgol Uwchradd Penrallt, Pwllheli, cyn symud yn ôl i Ysgol Dyffryn Nantlle fel pennaeth yn y 1980au cynnar. Yno buodd nes ei ymddeoliad.

Roedd yn arbenigwr mewn dwyieithrwydd plant, pwnc yr enillodd radd Doethur ynddo. Bu'n gefnogol iawn i'r Gymraeg yn yr ysgol yn ogystal â gweithgareddau allgyrsiol amrywiol.

Roedd hefyd yn weithgar yn ei bentref mabwysiedig; bu'n gadeirydd ar gangen leol Plaid Cymru, ac yn gefnogwr brwd i Glwb Garddio'r Groeslon, gan gipio nifer helaeth o wobrau am ei ddahlias, a hynny am flynyddoedd. Roedd o'n un o sefydlwyr papur bro Lleu. Wrth ystyried ei sêl dros yr iaith a Chymru, rhyfedd oedd ei benderfynoldeb dros gadw tîm pêl-droed Tref Caernarfon allan o drefn Cynghrair Cymru, gan fynnu aros gyda'r clybiau a ddewisodd chwarae yn y cynghreiriau Seisnig.

Bu farw 25 Hydref 2020, ar ôl cyfnod hir o salwch.

 Mae'r erthygl hon yn eginyn. Gallwch helpu prosiect Cof y Cwmwd drwy ychwanegu ati . Mae manylion am sut i wneud hyn yma