Tristian Evans
Mae Tristian Evans, FRSM, Llanllyfni, yn bianydd a cherddolegydd o fri.
"O'r 650,000 o arholiadau sy'n cael eu cynnal gan yr ABRSM ledled y byd bob blwyddyn, dim ond oddeutu 15-20 sydd yn pasio'r FRSM, ac mae pasio gyda rhagoriaeth yn beth anhygoel o brin," meddai ei athrawes Gillian Williams o Bwllheli, sydd ei hun yn arholwr ac yn safonwr ar gyfer yr ABRSM.[1]
Mae'n Gymrawd yr Ysgolion Cerdd Brenhinol – anrhydedd a ddyfarnwyd iddo wedi iddo gyflwyno datganiad o waith y cyfansoddwr Ravel yn Eglwys Ysgol Sant Paul yn Llundain, Gorffennaf 2017. Cyn hynny roedd wedi ennill gradd B.Mus (anrhydedd dosbarth cyntaf) ym Mangor yn 2006, M.A. a Ph.D. Mae ei waith ymchwil, gan gynnwys gwaith ar Philip Glass, y cyfansoddwr Americanaidd, wedi ennill cynulleidfa ryngwladol iddo.
Wedi iddo dderbyn Doethuriaeth ym Mangor yn 2010 bu'n darlithio yn Adran Cerddoriaeth y Brifysgol. Mae bellach yn gweithio ar ei liwt ei hun ac yn byw adref yn ei filltir sgwâr yn Llanllyfni efo’i wraig Lucy, yn agos at ei dad, Stan Evans, ac yn rhoi gwersi piano i blant lleol.[2]
Mae hefyd wedi ymchwilio i hanes Siôn Gwynedd (John Gwynneth).