Morris Pugh
Roedd Morris Edwin Pugh (g. 25 Tachwedd 1901) yn ficer Clynnog Fawr, 1945-1950.
Mab ydoedd i Rees Pugh (1861-1932), chwarelwr a hanai o Gorris, a Margaret Ann Jenkins ei wraig (1870-1932), a hanai o Langollen, ond a fu'n byw wedyn yn Ffestiniog. Symudai'r teulu o gwmpas wrth i'r tad symud o'r naill chwarel i'r llall, gan gynnwys cyfnod yn Nhreharris yn y De - cyn i Morris gael ei eni ym 1901 yn Stryd Llanegryn, Abergynolwyn, Meirionnydd.[1] Eglwyswyr oedd y teulu, mae'n debyg, gan iddynt fedyddio eu plant yn Eglwys Llanfihangel-y-Pennant.[2]
Gadawodd Morris yr ysgol ym 1915, gan fynd yn brentis groser. Mae cofnod amdano wedyn ym 1932 pan oedd yn fyfyriwr ac yn gweithredu fel gweinyddwr ystad ei rieni.[3] Erbyn 1939, roedd wedi cael ei ordeinio ac roedd yn byw yn Menai House, Stryd Fawr, Llangefni lle gweithiai fel offeiriad.[4] Ym 1944 priododd â Gwendoline M. Wilkes, clerc mewn swyddfa twrnai yng Nghaergybi.[5] Rhwng 1945 a 1950 ef oedd Ficer Clynnog.
Roedd Morris Pugh yn frawd i'r Parchedig Ivor Pugh, Ficer Clitheroe, ac i'r Canon Thomas Pugh, Cricieth.
Mae hanes llawn teulu Pugh i'w gael ar y we.[6]
Bu farw ym 1979. Erbyn hynny, roedd yn byw yn Hafan, Abergwyngregin.[7]
Cyfeiriadau
- ↑ Cyfrifiad plwyf Llanfihangel-y-Pennant, Meirionnydd, 1911
- ↑ Archifdy Dolgellau, Cofrestr Bedydd Llanfihangel-y-Pennant
- ↑ Hanes Teulu Rees Pugh, [1], cyrchwyd 21.12.2022
- ↑ Cofrestr 1939, Llangefni
- ↑ Cofrestr Caergybi, 1939; Mynegai Priodasau 1944
- ↑ Hanes Teulu Rees Pugh [2], cyrchwyd 21.12.2022
- ↑ Mynegai Marwolaeth Ptrofiant 1979