Bodryn

Fferm tua hanner ffordd rhwng Llandwrog a Dinas Dinlle yw Bodryn. Fodd bynnag, hyd yn gymharol ddiweddar yr ynganiad lleol oedd Modryn. Mae Glenda Carr wedi dilyn hynt yr enw yn ôl cyn belled â Chalendr y Rholiau Patent ar gyfer 1549, pryd y cofnodwyd yr enw fel Tythyn Modryn. Modryn a geir hefyd yn asesiad y Dreth Dir drwy'r 1770au ac yng Nghyfrifiad 1851. Rhestra Dr Carr nifer o ddamcaniaethau a gynigiwyd ynghylch ystyr yr enw, ond mae hi o'r farn mai yn y ffurf gynnar o 1549 y datgelir ystyr yr enw. Dilynir yr elfen tyddyn yn aml gan enw personol ac mae'n debygol iawn mai enw personol oedd Modryn hefyd, a bod troi'r M gychwynnol i B yn gymharol ddiweddar wedi cymylu'r ystyr. Modryn oedd y ffurf am ganrifoedd, pwy bynnag oedd y gŵr hwnnw a oedd yn ddeiliad gwreiddiol yr eiddo.¹

Cyfeiriadau

1. Am ymdriniaeth lawn gweler, Glenda Carr, Hen Enwau o Arfon, Llŷn ac Eifionydd, (Gwasg y Bwthyn, 2011), tt.34-5.