Gweinidogion Gosen (MC), Trefor

Er i Gapel Gosen (MC), Trefor agor ym 1862, a chael ei ailadeiladu ym 1875, ni fu gweinidog o gwbl ar yr eglwys tan 1913, er iddi fod yn eglwys gref iawn.

1913 : Y Parchedig Caleb Williams, B.A., o Gydweli, Sir Gaerfyrddin. Ymadawodd i Gapel y Bwlan, Llandwrog, ar 20 Tachwedd 1913.

1934-39 : Y Parchedig T.J.Edwards, B.A., B.D., brodor o Gapel Hendre, Sir Gaerfyrddin. Sefydlwyd 7 Hydref, 1934 ac ymadawodd i Fetws-y-coed, 1939.

1947-57 : Y Parchedig Emyr Roberts, B.A., B.D., brodor o Gwm-y-glo, Arfon. Daeth i Drefor o Dudweiliog (MC) yn Llŷn. Ymadawodd i'r Rhyl ar 30 Rhagfyr 1957. Bu'n un o sefydlwyr y Cylchgrawn Efengylaidd. Mae hefyd wedi ennill Y Fedal Ryddiaeth yn yr Eisteddfod Genedlaethol (Rhuthun 1973), am ei gyfrol Heddiw mae'n Eiriol. Roedd yn briod â Grace (a fu byw i fod yn gant oed), ac yn dad i Glynneth, Dafydd a John. Mae ei fab, John Emyr, yn llenor o fri ac yn enillydd cyson yn y Genedlaethol.

1960-65 : Y Parchedig Hartwell Lloyd Morgan, ddaeth i Drefor o eglwysi Llansawel a'r cylch, Sir Gaerfyrddin. Sefydlwyd ar 23 Mehefin, 1960. Ymadawodd yn Awst 1965 i Landysul a Chlos-y-graig.

1969 -  : Y Parchedig Goronwy Prys Owen, B.A., ddaeth o eglwys Maesgeirchen, Bangor, yn weinidog ar Gosen, Y Babell (Llanaelhaearn) a Chwm Coryn. Ymadawodd i Heol-y-dŵr, Caerfyrddin, tua chanol y saithdegau.