Black Lion, Y Bontnewydd

Ceir sôn am Black Lion mor gynnar â 1804, pan fu farw Cadwaladr Williams, "victualler" (sef darparwr bwyd a diod), The Black Lion, Bontnewydd. Mae papurau caniatáu gweinyddu ei eiddo wedi ei farwolaeth yn y Llyfrgell Genedlaethol. Mae'r cyfeiriad hwn yn tueddu awgrymu mai tafarnwr o ryw fath oedd o, a'r enw'n sicr yn awgrymu mai tafarn oedd ei gartref.

Ar fap a rhestr bennu'r degwm plwyf Llanwnda, 1838, fodd bynnag, mai Black Lion yn ymddangos fel fferm o ryw 20 acer, a'r tŷ'n sefyll ar y bryn uwchben Plas-y-bont - ar (ner ger) safle tŷ modern Llamedos heddiw. Rhan o dir y fferm oedd clwt wrth dalcen y bont dros Afon Gwyrfai lle saif siop y pentref heddiw, safle addas iawn ar gyfer tafarn. Yr adeg honno, Jane Hughes oedd perchennog Black Lion, a John Parry oedd tenant yr 20 acer.

Ni cheir ond ychydig o gyfeiriadau pendant at Black Lion fel tafarn, er gwaethaf yr enw awgrymog. Ym 1851, John Ellis, gŵr 42 oed a'i wraig Ellen oedd yn byw yno, ond disgrifiwyd John Ellis fel ffarmwr. Ym 1861, rhestrir Ellen Ellis fel ceidwad tafarn, a nodir bod Black Lion rhywle ymysg tai Pentre Uchaf, Y Bontnewydd. Gwraig weddw ydoedd erbyn hynny, ac roedd ei mab Henry yn ffermio 20 acer.

Clywir sôn yn y papurau newydd ym 1863 bod ffrwgwd wedi digwydd ar ddiwrnod ffair y Bontnewyddrhwng dynion y pentref a dynion o dref Caernarfon, a bod dyn o'r Plas Mawr, Y Groeslon wedi ei drywanu a bod wedi marw mewn canlyniad i'r cwffio. Digwyddodd hyn y tu allan i dafarn y Black Lion yn ôl y papur. Dyma felly ddau ddyddiad penodol ar gyfer y dafarn, sef 1861 ac 1863. O hynny allan, er bod yr enw'n parhau, nid oes sôn bod y Black Lion yn fyw na fferm. Ym 1871, Ellen Ellis sydd yno o hyd, ond yn cael ei disgrifio fel ffarmwraig. Ni cheir sôn penodol am y lle yng nghyfrifiad 1881, ond nodwyd bod Ellen Ellis ynghyd â Henry a Mary ei merch, yn byw ym mhentref Bontnewydd, ac yn dal 18 acer o dir, gan gyflogi un labrwr. Bu farw Ellen Ellis 5 Rhagfyr 1882, gan adael eiddo gwerth £150.

Erbyn 1891, ceir Henry Ellis yn defnyddio ei enw ganol fel cyfenw, sef Jones. Roedd y Cyfrifiad wedi ei ddisgrifio fel ffermwr, yn byw gyda'i wraig Jane yn "Sign", ger y bont yn y Bontnewydd. Yr oedd y ddau yno ym 1901 hefyd. Byddai'n anodd cysoni'r enw "Black Lion" gydag enw "Sign" er eu bod yn cael eu rhetru yn yr un ddarn o'r plwyf, heblaw am hysbysebion eang yn y wasg ym 1903 pan aeth ystad Tŷ Coch ar werth, a nodwyd ymysg yr eiddo i'w gwerthu plot adeiladu yn Black Lion, rhan o fferm Sign. Ymddengys felly fod Black Lion wedi cael ei briodoli i'r darn o dir wrth dalcen y bont, a bod yr enw "Sign" wedi ei fabwysiadu ar gyfer yr 20 acer oedd yn perthyn i deulu'r Black Lion yn ail hanner y 19g. Gallwn ymhellach gymryd bod tafarn y Black Lion wedi gweithredu wrth y bont am ychydig o gwmpas y flwyddyn 1860, a chyn hynny ar droed y ganrif fod tafarn o';r un enw yn weithredol ar yr allt yn codi o'r bont - a hynny cyn bod fawr o dai wedi eu hadeiladu ger yr afon.