David Thomas Jones
Perlysieuydd meddygol oedd David Thomas Jones (1781-1849). Bu'n byw yn Hafod yr Esgob, Mynydd Llanllyfni, efo'i wraig Elizabeth lle gwnaethant blannu gardd a oedd yn llawn o lysiau lleol ac estron. Weithiau, daeth pobl o hyd i blanhigion prin yn y cyffiniau, a hynny ddegawdau ar ôl marwolaeth eu mab ieuengaf ym 1888. Tyrrai pobl y wlad ato mewn oes pan oedd meddygaeth wyddonol ond yn dechrau datblygu.
Cyhoeddwyd llyfr o'i feddyginiaethau a oedd, mewn gwirionedd, yn addasiad a thalfyriad o waith y perlysieuydd Seisnig enwog Nicholas Culpeper (1614-1654). Roedd hon yn gyfrol hynod boblogaidd mewn cartrefi yng Ngogledd Cymru am flynyddoedd, ac aeth trwy nifer o argraffiadau hyd mor ddiweddar â 1883. Cynhwysodd luniau amrwd wedi'u lliwio, gyda'r bwriad o roi rhyw syniad o liwiau'r dail er mwyn osgoi camgymeriadau anffodus!
Ar lethrau de-orllewinol Garnedd Goch mae Ffynnon y Doctor - mae'r dŵr oer i fod yn fuddiol i bobl efo crydcymalau, eryr a phroblemau eraill. Fodd bynnag, mae profion wedi dangos nad oes rhinweddau cemegol neilltuol gan ddŵr y ffynnon.
Roedd ei fab David Thomas Jones (1824-1888), hefyd, yn enwog am feddyginiaeth. Cafodd rhai o'i foddion i blant eu gwerthu dros Ewrop ac America.[1]
Fe'u claddwyd ym Mynwent y Bedyddwyr Bach, Llanllyfni. Mae englyn ar eu bedd fel a ganlyn:
Er meddu ar y moddion - a wellant Eraill o glefydon; Angau trwch i'r llwch gell hon Yma ddug y meddygon.
