Odyn galch Trefor
Roedd Odyn Galch Trefor yn weithredol tua 1900 pan enwyd yr odyn ar fap Ordnans; roedd yr un adeilad yno ym 1888 ond heb ei enwi ar y map honno[1]. Gan fod odynau'n adeiladau bur nodedig o ran siâp a dyluniad, gellid fod yn weddol siŵr felly ei fod yn weithredol erbyn y dyddiad hwnnw. Mae'n bosibl y codwyd yr odyn ar adeg gosod cangen y pentref o dramffordd y chwarel tua 1870.[2]
Safai mewn man a elwid Y Berllan yn wreiddiol ond a gafodd ei ailenwi'n "Lime Street", sef dros yr afon ym mhen eithaf Stryd Farren (neu Ffordd yr Eifl wedi hynny), ym mhentref Trefor lle roedd cangen o dramffordd y chwarel yn gorffen.[3] Dichon yn wir mae'r dramffordd a roddodd fodolaeth i'r odyn yn y lle penodol hwnnw, gan fod modd cludo'r galchfaen i'w llosgi yn syth o'r llong - a byddai calch (ynghyd â glo) yn ddefnyddiol fel llwyth mewn llongau a fyddai wedi dod yn wag fel arall i nôl y wenithfaen. Ni pharhaodd yn hir fodd bynnag. Erbyn 1914, roedd yr odyn wedi ei dymchwel a chodwyd rhes o dai ar y safle, sydd erbyn heddiw yn 12-16 Ffordd yr Eifl.[4]
Gan gofio bod cryn adeiladu i ymestyn pentref Trefor ar yr adeg pan oedd yr odyn ar waith, a bod calch yn cael ei ddefnyddio i wneud sment ac i blastro, ac i wyngalchu adeiladau, mae'n debyg bod odyn Trefor yn gymaint o ddefnydd i'r gwaith a'r pentrefwyr ag i'r y ffermwyr lleol a ddefnyddiai galch fel gwrtaith.
Mae'r erthygl hon yn eginyn. Gallwch helpu prosiect Cof y Cwmwd drwy ychwanegu ati . Mae manylion am sut i wneud hyn yma