Helfa Pen-y-groes

Ni wyddys fawr am Helfa Penygroes ond cynhaliwyd cyfarfod fis Ionawr 1828 ac ymhen y flwyddyn eto yn Ionawr 1829. Ar ôl dilyn yr helgwn, aeth pawb i dafarn y Stag am ginio. Gelwid y meistr yn "Comptroller" (sef Rheolwr neu Feistr) ac roedd ganddo ddirprwy. Ym 1828, Griffith Jones oedd y meistr, a Robert Lloyd oedd ei ddirprwy. Y flwyddyn ganlynol, Robert Lloyd oedd y meistr, gyda dyn o'r enw Samuel Wagstaff yn ddirprwy iddo. Dichon mai am flwyddyn y byddai'r meistr yn dal y swydd, cyn cael ei ddilyn gan ei ddirprwy, gan fod hysbyseb yn cyhoeddi helfa fis Hydref y flwyddyn honno, gan enwi Samuel Wagstaff fel y "comptroller" a John Jones yn ddirprwy iddo. Cychwynnodd yr helgwn am 10 a chynhaliwyd cinio i'r helwyr am bedwar yn nhŷ Mr Price Griffith, sef Tafarn y Stag.