Adeiladu llongau yn Nhrefor

Yn wahanol i drefi morwrol fel Nefyn, Pwllheli a Phorthmadog nid oedd traddodiad sylweddol o adeiladu llongau yn Nhrefor. Fodd bynnag, yn ei gyfrol bwysig Hen Longau Sir Gaernarfon mae David Thomas yn cyfeirio at dair llong a adeiladwyd ar lan y môr yn Nhrefor. Adeiladwyd y gyntaf o'r rhain ym 1854, ddwy flynedd cyn adeiladu tai cyntaf pentref newydd Trefor. Slŵp fechan un mast 20 tunnell oedd hon ac, yn unol â'r arfer o roi enwau Saesneg i longau a chychod, fe'i galwyd yn "Arvon Lass". Nodir iddi gael ei cholli ar y môr ond ni cheir unrhyw fanylion pryd y digwyddodd hynny.